Ravet crime : एक्स गर्लफ्रेंड च्या गळ्यावर वार करून जीवे मारण्याचा प्रयत्न; गुन्हा दाखल
निगडी (प्रतिनिधी): पिंपरी चिंचवड मधील रावेत मधून एक धक्कादायक माहिती समोर येत आहे. मागील दीड वर्षांपूर्वी ब्रेकअप झालेले असताना तरुणाने तरुणीला रस्त्यात अडवून आडबाजूला नेऊन तिच्या गळ्यावर आणि हातावर धारदार शस्त्राने वार करत तिचा खून करण्याचा प्रयत्न केला.
याप्रकरणी आसिफ मोहम्मद शेख (वय 24, रा. किवळे) याला रावेत पोलिसांनी अटक केली आहे. जखमी 19 वर्षीय तरुणीने रावेत पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी तरुणीने आरोपी शेख याच्यासोबत असलेले प्रेमसंबंध मागील दीड वर्षांपूर्वी पूर्णपणे तोडले होते. त्याचा राग शेख याच्या मनात होता. सोमवारी (दि. 27) सायंकाळी साडेसहा वाजताच्या सुमारास तरुणी कामावरून घरी जात होती. त्यावेळी शेख याने तिला किवळे येथील एका मोकळ्या जागेत नेले.
मोकळ्या जागेत नेऊन तरुणीला मारहाण केली. तरुणीला जीवे मारण्याच्या उद्देशाने तरुणीचा गळा दाबून धारदार शस्त्राने तिच्या गळ्यावर आणि हातावर वार केले. यामध्ये तरुणी गंभीर जखमी झाली आहे. रावेत पोलीस तपास करीत आहेत.
