लिंबी चिचोळी : श्री जगद्गुरु रेवणसिद्धेश्वर प्रशालेचे माजी विद्यार्थी स्नेहसंमेलन उत्साहात संपन्न

लिंबी चिचोळी : श्री जगद्गुरु रेवणसिद्धेश्वर प्रशालेचे माजी विद्यार्थी स्नेहसंमेलन उत्साहात संपन्न
(ज्ञानदानाचे ऋण व्यक्त करत, गुरुजनांच्या उपस्थितीत माजी विद्यार्थ्यांनी प्रकट केली शाळेप्रती कृतज्ञता)

दक्षिण सोलापूर तालुक्यातील लिंबी चिचोळी येथील श्री जगद्गुरु रेवणसिद्धेश्वर प्रशालेच्या माजी विद्यार्थ्यांचे वार्षिक स्नेहसंमेलन मोठ्या उत्साहात आणि भावनिक वातावरणात संपन्न झाले. या निमित्ताने विविध ठिकाणी कार्यरत असलेले माजी विद्यार्थी एकत्र आले आणि शाळेतील सुवर्णक्षणांच्या आठवणींना उजाळा देत, ज्ञानदानाचे ऋण भावपूर्वक व्यक्त केले.

कार्यक्रमाचे वैशिष्ट्य म्हणजे या स्नेहसंमेलनाला शाळेचे ज्येष्ठ व आदरणीय शिक्षक — डोंबाळे सर, पाटील सर, माशाळे सर आणि पाथरूट सर — यांच्या स्नेहपूर्ण उपस्थितीचा लाभ लाभला. विद्यार्थ्यांनी त्यांच्या मार्गदर्शनाखाली शिकलेल्या संस्कारांचे, शिक्षणातील कठोर परिश्रमांचे आणि दिलेल्या प्रेरणेचे विशेष स्मरण केले. गुरुजनांनीही आपल्या विद्यार्थ्यांच्या विविध क्षेत्रातील यशाचा गौरव करत त्यांना पुढील वाटचालीसाठी आशीर्वाद दिले.

कार्यक्रमात शाळेच्या प्रगतीविषयी चर्चा झाली तसेच समाजोपयोगी उपक्रमांबाबत माजी विद्यार्थ्यांनी आपले विचार मांडले. माजी विद्यार्थ्यांमधील परस्पर स्नेह आणि एकोपा वृद्धिंगत करण्याच्या हेतूने विविध खेळ, सांस्कृतिक कार्यक्रम आणि अनुभवकथनाचे सत्रही घेण्यात आले.

या स्नेहसंमेलनाचे यशस्वी आयोजन करण्यासाठी राहुल होटगे, मल्लिनाथ कोंणदे, शशी गायकवाड, राजशेखर सोरेगाव, रवी कांबळे, राजू कोळी, दीपा लोभे, स्वाती कांबळे आणि लक्ष्मी लिंबितोटे या माजी विद्यार्थ्यांच्या टीमने विशेष मेहनत घेतली. त्यांच्या नियोजनबद्ध प्रयत्नामुळे संपूर्ण कार्यक्रम शिस्तबद्ध, आनंददायी आणि संस्मरणीय ठरला.

कार्यक्रमाच्या शेवटी सर्वांनी “शाळेने दिलेली मूल्यं आणि शिक्षण हीच खरी संपत्ती आहे” असे सांगत भविष्यात दरवर्षी अशा स्नेहसंमेलनाचे आयोजन करण्याचा संकल्प केला.

— ✍️ गावगाथा प्रतिनिधी, लिंबी चिचोळी