अक्कलकोटचे शतकवीर रक्तदाते अभिजित महादेव लोके यांना “राज्यस्तरीय बसवरत्न पुरस्कार” प्रदान!

अक्कलकोटचे शतकवीर रक्तदाते अभिजित महादेव लोके यांना “राज्यस्तरीय बसवरत्न पुरस्कार” प्रदान!

मुरूम (ता. उमरगा, जि. धाराशिव) | बसव प्रतिष्ठान, मुरूम यांच्या वतीने देण्यात येणारा “राज्यस्तरीय बसवरत्न पुरस्कार – २०२५” यंदा अक्कलकोट येथील समाजसेवक व शतकवीर रक्तदाते श्री. अभिजित महादेव लोके सर यांना प्रदान करण्यात आला आहे. या गौरवाने अक्कलकोट व संपूर्ण सोलापूर जिल्ह्याच्या शिरपेचात मानाचा तुरा खोवला गेला आहे.

पुरस्कार प्रदान सोहळा मुरूम येथे मोठ्या उत्साहात पार पडला. या सोहळ्यास बसव प्रतिष्ठानचे अध्यक्ष मा. श्री. डॉ रामलिंग पुराणे, प्रतिष्ठानचे पदाधिकारी, विविध सामाजिक क्षेत्रातील मान्यवर उपस्थित होते.

श्री. लोके सर यांनी आतापर्यंत १०० हून अधिक वेळा स्वैच्छिक रक्तदान करून सामाजिक बांधिलकीचे उत्कृष्ट उदाहरण समाजासमोर ठेवले आहे. केवळ रक्तदानच नव्हे, तर युवकांमध्ये सामाजिक जाणीव निर्माण व्हावी यासाठी ते सातत्याने रक्तदानचे महत्त्व जागृती करतं असतात

या कार्याची दखल घेऊन बसव प्रतिष्ठानने त्यांना हा पुरस्कार प्रदान केला. त्यांच्या कार्यातून प्रेरणा घेऊन अनेक तरुण सामाजिक कार्यात सहभागी होत आहेत, हे विशेष.

पुरस्कार स्वीकारताना श्री. लोके सर म्हणाले, “हा पुरस्कार केवळ माझ्यासाठी नसून, प्रत्येक रक्तदात्यासाठी आहे. समाजासाठी काही तरी देण्याची भावना जिवंत ठेवणाऱ्या प्रत्येकासाठी आहे.”

अशा या कार्यकर्त्याला बसव प्रतिष्ठानचा सन्मान लाभल्यामुळे अक्कलकोट व परिसरातून अभिनंदनाचा वर्षाव होत आहे.

–