श्री वटवृक्ष देवस्थान समितीची निस्वार्थ सेवा उल्लेखनीय बाब – आय.पी.एस.सोनवणे
मा.पोलीस महासंचालक राजेंद्र सोनावणे व कुटुंबीयांचा देवस्थान कार्यालयात सत्कार करताना महेश इंगळे व अन्य दिसत आहेत.
श्री वटवृक्ष देवस्थान समितीची निस्वार्थ सेवा उल्लेखनीय बाब – आय.पी.एस.सोनवणे
(श्रीशैल गवंडी, अ.कोट, दि.२३/१२/२४) –
श्री स्वामी समर्थांचे मूळस्थान असलेले येथील श्री वटवृक्ष स्वामी महाराज देवस्थान हे स्वामींचे वास्तव्य असलेले जागृत स्थान आहे. स्वामी समर्थांच्या भक्तीतून अनेक भाविकांना विविध माध्यमातून स्वामींच्या आशीर्वादाची प्रचिती येत आहे. स्वामींचे हे आशीर्वाद स्वामी दर्शनाच्या माध्यमातून भाविकांना तात्काळ पुरविण्याचे काम श्री वटवृक्ष स्वामी महाराज देवस्थान समितीचे प्रमुख महेश इंगळे हे अत्यंत सेवाभावी वृत्तीने सांभाळत आहेत. वैयक्तिक जीवनातील सुख दुःखांना छेद देऊन महेश इंगळे हे प्रत्यक्ष वटवृक्षाखाली तासंतास उभे राहून प्रत्येक भक्तांना मोफत व सुलभ स्वामींचे दर्शन कसे मिळेल याचे अत्यंत तळमळीने नियोजन करित असतात महेश इंगळे यांच्या या व्यक्तिमत्त्वाच्या माध्यमातून श्री वटवृक्ष स्वामी महाराज देवस्थान समितीची ही निस्वार्थ सेवा म्हणजे उल्लेखनीय बाब असल्याचे मनोगत भारतीय पोलीस सेवेतील माजी अतिरिक्त पोलीस महासंचालक राजेंद्र सोनावणे यांनी व्यक्त केले. ते नुकतेच येथील श्री वटवृक्ष स्वामी महाराज मंदिरास सहकुटुंब भेट देऊन श्री स्वामी समर्थांचे दर्शन घेतले. याप्रसंगी मंदिर समितीच्या वतीने समितीचे चेअरमन महेश इंगळे यांनी राजेंद्र सोनावणे यांचा स्वामी समर्थांचे कृपावस्त्र, प्रसाद, प्रतिमा देऊन यथोचित सन्मान केला. यावेळी सोनवणे बोलत होते. यावेळी मंदिर समितीचे सचिव आत्माराम घाटगे, विश्वस्त महेश गोगी, प्रथमेश इंगळे, श्रीशैल गवंडी, प्रसाद सोनार, गिरीश पवार, श्रीकांत मलवे, विपुल जाधव आदींसह भाविक भक्त उपस्थित होते.
फोटो ओळ – मा.पोलीस महासंचालक राजेंद्र सोनावणे व कुटुंबीयांचा देवस्थान कार्यालयात सत्कार करताना महेश इंगळे व अन्य दिसत आहेत.
