अक्कलकोट तालुक्यात शेतशिवारात वेळा अमावस्या उत्साहात साजरी
अक्कलकोट -निसर्गाचा दगाफटका कितीही बसो, पण काळ्याआईची मनोभावे पुजन करत शेतकऱ्यांनी शेतातील उत्पन्ना समृद्धी व भरभराटी होण्याची मनोकामना व्यक्त करून वेळा अमावस्या (येळवस) उत्साहात साजरी केली. दरम्यान यंदा रब्बीच्या पेरण्याचे गणीतच कोलमडल्याने पीक – पाण्याची अवस्था बिकट आहे. तरीही पाण्याच्या उपलब्धेतेमुळे बहर असलेल्या पिक, शिवारात शेतकरी कुटुंबांनी वनभोजनाचा आनंद घेतला.
वेळा अमावस्याचा सण हा शेतकरी कुटुंबासाठी एक आनंदाची पर्वणीच असते. यंदा कमी पर्जन्यमानामुळे खरीप हंगामातील पिकाचे उत्पन्न जेमतेमच निघाले.जमिनीच्या कमी ओलाव्यामुळे रब्बी हंगामातील पेरणी उशिरा सुरू झाली. पेरणीची टक्केवारी निम्म्यावर आली, परिणामी ज्वारीचे क्षेत्र घटले. बहुतांश कोरडवाहु क्षेत्रात पेरणीच नाही. पाण्याची उपलब्धता असलेल्या शिवारातील पिके बहरात आले. तरी पिकांवरील कीड, अळींचे विघ्न दुर करण्याचा शेतकऱ्यांना खटापोट करावा लागतोय. दरम्यान अमावस्याच्या पुजेसाठी व विविध खाद्यपदार्थाच्या तयारीसाठी शेतकरी कुटुंबात तयारी सुरू होती.
अंबिलाचं बिंदग डोक्यावर घेऊन जाण्याची लगभग दिसून आली. दळणवळणाची साधने वाढल्याने बऱ्याच शेतकऱ्यांनी बिंदग्याचा प्रवास वहानातून करत असल्याचेही चित्र दिसून आले. बैलगाडीतून सहकुटुंब शेताकडे जाण्याची मजा औरच असते. पण क्वचित ठिकाणीच बैलगाडी दिसत आहे. अजुनही बरेच शेतकरी कुटुंबियांनी बैलगाडीतुन वेळ अमावस्येला जाण्याची प्रथा कायम ठेवली. शिवाय दुचाकी, चारचाकी, ट्रॅक्टरमधुनही शेताकडे शेतकरी कुटुंब जात असल्याचे चित्र दिसून आले. दुपारी बारानंतर शेतकरी कुटुंबांनी पाच पांडवांची विधिवत पुजा केली. त्यानंतर शेतातील ज्वारी, हरभरा, करडई पिकावर अंबिल शिंपडले. पिकाच्या हिरवाईत बाळ गोपाळांनी मनसोक्त खेळाचा आनंद घेतला.
सहकुटुंब, मित्रमंडळींसह वनभोजनाचा आनंद
बाजरीपासून बनवलेले उंडे, बाजरी , ज्वारीच्या कडक भाकरी, विविध पालेभाज्यापासून बनवलेली भाजी (भज्जी), वांगे, कांद्याची भरीत, गव्हाची खीर, कोंदीच्या गोड पोळ्या,आंबट भात (खिचडा) आणि वरून चवदार अंबिलाचा घोट घेत दुपारी साडेबारानंतर शेत शिवारात वनभोजनाचा शेतकरी कुटुंब व मित्रपरिवारांनी मनसोक्त स्वाद घेतला. वनभोजनानंतर कडवट – अंबट बोर, हिरव्या चिंचा आणि मधमाश्यांनी संकलित केलेल्या मोहळ मारून त्याचा आस्वाद घेण्यासाठी तरूण, चिमूकले बांधा, बांधावरून फिरत होते.
