Mumbai: मराठी कुटुंबावर हल्ला करणारा अखिलेश शुक्ला निलंबित; माजुरड्यांचा माज उतरविल्याशिवाय….
मुंबई (प्रतिनिधी): कल्याण येथील मराठमोळ्या कुटुंबाला मारहाण केल्याच्या प्रकरणाचे पडसाद अधिवेशनात उमटले. राज्याचे मुख्यमंत्री देवेंद्र फडणवीस यांनी मोठी कारवाईची घोषणा केली आहे.
महाराष्ट्र पर्यटन विकास महामंडळाचा (एमटीडीसी) अधिकारी असलेला अखिलेश शुक्ला याच्यावर निलंबनाची कारवाई करण्यात आली आहे. मुख्यमंत्री देवेंद्र फडणवीस यांनी निलंबनाची घोषणा सभागृहात केली. तसेच माजूरड्यांचा माज उतरवल्याशिवाय राहणार नाही असं मुख्यमंत्री म्हणाले. तसेच कुठल्याही मराठी माणसावर आम्ही अन्याय होऊ देणार नाही असंही मुख्यमंत्री देवेंद्र फडणवीस म्हणाले.
अखिलेश शुक्ला तात्काळ निलंबित
कल्याण मधील घटनेने संतापाची लाट नागरिकांमध्ये निर्माण झाली आहे. अखिलेश शुक्ला हा एमटीडीसीचा कर्मचारी आहे. त्याच्यावर आणि त्याच्या पत्नीवर एफआयआर नोंद झाला आहे. खडकपाडा पोलीस स्टेशनमध्ये एफआयआर नोंद आहे. अखिलेश शुक्ला याला तात्काळ निलंबित करण्याची कारवाई करण्यात येत आहे. पुढील कारवाई पोलीस करतील.
माजुरड्यांचा माज उतरवल्याशिवाय राहणार नाही
कोणाच्याही मनात शंका असण्याचे कारण नाही… मुंबई आणि महाराष्ट्र हा मराठी माणसाचाच होता, मराठी माणसाचाच आहे आणि मराठी माणसाचाच राहील. कधीकधी काही नमुने चुकीचं वक्तव्य करतात. माज आणल्यासारखं करतात. अशा माजुरड्यांचा माज उतरवल्याशिवाय आम्ही राहणार नाही असंही मुख्यमंत्री म्हणाले.
