महेश इंगळे यांच्या मार्गदर्शनानुसार भारताच्या पूर्व भागातही करणार स्वामीनामाचा, वटवृक्ष मंदीराचा प्रचार व प्रसार – खासदार गौरव गोगई

महेश इंगळे यांच्या मार्गदर्शनानुसार भारताच्या पूर्व भागातही करणार स्वामीनामाचा, वटवृक्ष मंदीराचा प्रचार
व प्रसार – खासदार गौरव गोगई

स्वामी समर्थांच्या दर्शनाने भारावून खासदार गौरव गोगई यांचे मनोगत.

खासदार गौरव गोगई यांचा वटवृक्ष मंदिरात झाला प्रथमेश इंगळे यांच्या हस्ते सत्कार.

(श्रीशैल गवंडी, अ.कोट, दि.०५/११/२५)
येथील अक्कलकोट निवासी श्री.स्वामी समर्थ महाराज हे आपल्या अवतार कार्यात संपूर्ण भारत भ्रमण करून अक्कलकोट निवासी झाले असल्याची माहिती मंदिर समितीचे चेअरमन महेश इंगळे यांच्या वतीने ऐकून खूप प्रभावित झालो आहे. आज प्रथमच येथील अक्कलकोट वटवृक्ष निवासी श्री स्वामी समर्थांचे दर्शन घेऊन आपण धन्य झालो आहे. दत्त अवतारी श्री स्वामी समर्थांच्या अवतार कार्याची, जागृततेची व त्यांच्या प्रचितीची महती संपूर्ण भारतभर प्रसारित व्हावी या उद्देशाने आपण येथील श्री वटवृक्ष स्वामी महाराज देवस्थानचे चेअरमन महेश इंगळे यांच्या मार्गदर्शनानुसार अरुणाचल प्रदेश, दार्जिलिंग, आसाम, सिक्कीम, नागालँड, मणिपूर, इम्फाळ, पश्चिम बंगाल इत्यादी आपल्या स्थानिक भारताच्या पूर्व भागातही स्वामी नामाचा व स्वामी भक्तीचा तथा श्री स्वामी समर्थांचे
मूळस्थान असलेल्या येथील श्री वटवृक्ष स्वामी महाराज देवस्थानचा प्रचार व प्रसार करणार असल्याचे मनोगत आसाम राज्याचे माजी मुख्यमंत्री तरुण गोगई यांचे सुपुत्र खासदार गौरव गोगई यांनी व्यक्त केले. ते नुकतेच येथील श्री वटवृक्ष स्वामी महाराज मंदिरास भेट देऊन श्री स्वामी समर्थांचे मनोभावे दर्शन घेऊन श्री स्वामी समर्थांची आरती केली, तसेच मंदिर समितीच्या आध्यात्मिक व धार्मिक कार्याचा आढावा जाणून घेतला. याप्रसंगी मंदिर समितीच्या वतीने समितीचे चेअरमन महेश इंगळे यांच्या मार्गदर्शनाखाली प्रथमेश इंगळे यांनी खासदार गौरव गोगई यांचा श्री स्वामी समर्थांचे कृपावस्त्र, प्रसाद, प्रतिमा देऊन यथोचित सन्मान केला. यावेळी खासदार गौरव गोगई बोलत होते. पुढे बोलताना खासदार गोगई यांनी देवादी देव महादेवाचे परमभक्त दत्त अवतारी श्री स्वामी समर्थ यांच्या दर्शनाने आपण खूपच प्रभावित झालो आहे, त्यामुळे येथील श्री वटवृक्ष स्वामी महाराज देवस्थान व देवस्थानच्या धार्मिक विकास कार्यास आपण सर्वतोपरी सदैव सहकार्य करण्यास तत्पर असल्याचे मनोगत व्यक्त केले. यानंतर मंदिर समितीच्या कार्यास व महेश इंगळे यांच्या स्वामी सेवेस शुभेच्छा व्यक्त केल्या.यावेळी प्रथमेश इंगळे, तालुका कॉंग्रेस कमिटीचे अध्यक्ष मल्लिकार्जुन पाटील, सो.म.पा. माजी नगरसेवक चेतन नरोटे, विनोद भोसले, माजी उपनगराध्यक्ष अश्पाकभाई बळोरगी, मंदिर समितीचे सचिव आत्माराम घाटगे, विश्वस्त महेश गोगी, श्रीशैल गवंडी, शिवशरण अचलेर, श्रीकांत मलवे, विपुल जाधव, सागर गोंडाळ, समर्थ स्वामी, दर्शन घाटगे आदींसह भाविक भक्त मोठ्या संख्येने उपस्थित होते.

फोटो ओळ – खासदार गौरव गोगई यांचा देवस्थान मध्ये सत्कार करताना प्रथमेश इंगळे व अन्य दिसत आहेत.