वागदरीच्या सुपुत्र नागेश लोखंडे यांच्या ‘बंजारा’ हिंदी संगीत व्हिडिओचे अभिनेत्री ईशा देओल यांच्या हस्ते भव्य लोकार्पण

वागदरीच्या सुपुत्र नागेश लोखंडे यांच्या ‘बंजारा’ हिंदी संगीत व्हिडिओचे अभिनेत्री ईशा देओल यांच्या हस्ते भव्य लोकार्पण

   

मुंबई : (प्रतिनिधी) – सोलापूर जिल्ह्यातील अक्कलकोट तालुक्यातील वागदरी गावचे सुपुत्र आणि युवा निर्माते नागेश लोखंडे यांनी निर्मिती केलेल्या “बंजारा” या हिंदी संगीत व्हिडिओचे भव्य लोकार्पण मुंबईत उत्साहपूर्ण वातावरणात पार पडले. या कार्यक्रमाला प्रमुख पाहुण्या म्हणून प्रसिद्ध अभिनेत्री ईशा देओल उपस्थित होत्या.
मुंबईतील Millennium Club Juhu येथे मंगळवार, ३१ मार्च २०२६ रोजी सायंकाळी ७ ते रात्री १० या वेळेत हा भव्य सोहळा आयोजित करण्यात आला होता. ट्रू ड्रीम म्युझिकच्या वतीने सादर करण्यात आलेल्या या कार्यक्रमाला माध्यम प्रतिनिधी, कलाकार, संगीत क्षेत्रातील मान्यवर तसेच विशेष पाहुण्यांची मोठ्या संख्येने उपस्थिती लाभली. कार्यक्रमाचे वातावरण उत्साहपूर्ण व संस्मरणीय असे होते.

“बंजारा” या गीताला सुप्रसिद्ध गायक राजा हसन यांनी आपल्या सुरेल आवाजाने सजवले आहे. या संगीत व्हिडिओमध्ये कलाकार बंटी राठोड आणि आलिया हमीदी यांनी आपल्या प्रभावी अभिनयाने विशेष छाप पाडली आहे. या गीताचे संगीत आणि शब्द एम. डी. इरफान अली यांनी दिले असून व्हिडिओचे दिग्दर्शन मुनीश कल्याण यांनी केले आहे.
कार्यक्रमाचे मुख्य आकर्षण म्हणजे अभिनेत्री ईशा देओल यांची उपस्थिती. प्रमुख पाहुण्या म्हणून त्यांनी संपूर्ण टीमच्या मेहनतीचे कौतुक करत “बंजारा” या संगीत प्रकल्पासाठी मनःपूर्वक शुभेच्छा दिल्या. त्यांच्या उपस्थितीमुळे कार्यक्रमाला वेगळेच आकर्षण प्राप्त झाले.
यावेळी उपस्थित मान्यवर आणि माध्यम प्रतिनिधींना “बंजारा” या गीताची विशेष स्क्रीनिंग दाखविण्यात आली. गीत पाहिल्यानंतर उपस्थितांनी टाळ्यांच्या कडकडाटात संपूर्ण टीमचे अभिनंदन केले.

कार्यक्रमाच्या शेवटी निर्माते नागेश लोखंडे आणि संपूर्ण टीमने उपस्थित मान्यवर, कलाकार आणि माध्यम प्रतिनिधींचे मनःपूर्वक आभार मानले. अत्यंत आनंददायी वातावरणात पार पडलेला हा लोकार्पण सोहळा संगीतप्रेमींसाठी अविस्मरणीय ठरला.