🎉 ३१ वर्षांच्या सेवेनंतर विजयकुमार चिंचोळी सरांचा सेवानिवृत्ती निमित्त सन्मानपूर्वक निरोप 🎉

🎉 ३१ वर्षांच्या सेवेनंतर विजयकुमार चिंचोळी सरांचा सेवानिवृत्ती निमित्त सन्मानपूर्वक निरोप 🎉

सोलापूर —
आजचा दिवस डी.एस.टी.एस. मंडळाच्या कॉलेज ऑफ फार्मसीसाठी भावनिक ठरला. केमिस्ट्री विभागातील प्रयोगशाळा सहाय्यक श्री. विजयकुमार चिंचोळी सर यांनी ३१ वर्षांच्या प्रदीर्घ सेवेनंतर सेवानिवृत्ती घेतली.

चिंचोळी सरांचा प्रवास अत्यंत प्रेरणादायी आहे. स्वतः या महाविद्यालयातून डी.फार्मसी शिक्षण पूर्ण केलेल्या विजयकुमार सरांनी सुरुवातीपासूनच आपल्या गुरूंच्या सान्निध्यात, आपल्या संस्थेमध्ये कार्य करण्याची इच्छा व्यक्त केली होती. सहकार महर्षी वि.गु. शिवदारे अण्णांच्या प्रेरणेने त्यांचा एका सेवाभावी कर्मचाऱ्याचा प्रवास सुरु झाला.

गेल्या तीन दशकांत सरांनी आपल्या जबाबदाऱ्या निष्ठा, शिस्तबद्धता आणि प्रामाणिकपणे पार पाडल्या. त्यांच्या कार्याचा विद्यार्थी, सहकारी व संस्थेवर कायम सकारात्मक प्रभाव राहिला.

सेवानिवृत्ती निमित्त आयोजित कार्यक्रमात शिक्षकेत्तर कर्मचारी परिवारातर्फे त्यांचा यथोचित सत्कार करण्यात आला. या प्रसंगी प्राचार्य प्रा. एम.एस. कलशेट्टी, संस्थेचे सहसचिव श्री. अविनाश म्हेत्रे, रेवणसिद्ध कोळी, प्रकाश अतनुरे, लक्ष्मण बिराजदार, नागेश वंजारे, राजाराम नारायणी, सौ. अमिता किलजे व अन्य कर्मचारी उपस्थित होते.

संस्थेच्या प्रगतीसाठी चिंचोळी सरांचे योगदान अमूल्य असल्याचे मान्यवरांनी गौरवोद्गार काढले.
सरांना पुढील आयुष्यासाठी उत्तम आरोग्य, समाधान आणि आनंद लाभो, अशा शुभेच्छा देत उपस्थितांनी त्यांना सन्मानपूर्वक निरोप दिला.