कोल्हापूरमधील हमालाच्या कन्येनं MPSC परीक्षेत उमटवला ठसा….

शाब्बास पोरी… कोल्हापूरमधील हमालाच्या कन्येनं MPSC परीक्षेत उमटवला ठसा….

   

MPSC Exam: बिकट परिस्थितीवर मानत कोल्हापूरमधील कन्येने फक्त आपल्या कुटुंबांची मानही अभिनाने उंचावली आहे. एमपीएससीच्या उत्पादन शुल्क परीक्षेत तिने घवघवित यश मिळवले आहे. राधानगरी तालुक्यातल्या जोगेवाडी या डोंगराळ भागातील भागात राहणाऱ्या कन्येने उत्पादन शुल्क दुय्यम निरीक्षक परीक्षेत बाजी मारली आहे. ओबीसी महिलांमधून ती पहिली आली आहे. यामुळे तिचे सर्वत्र कौतुक होत आहे.
ग्रामीण भागात अनेक कुटुंबाची सर्वसाधारण परिस्थिती बघायला मिळते. पण परिस्थिती बिकट असतानाही आपली चुणूक दाखवत कोल्हापूरच्या एका कन्येने एमपीएससीमधून राज्य उत्पादन शुल्क दुय्यम निरीक्षक परीक्षेत ओबीसी महिलांमधून नुकताच राज्यात प्रथम क्रमांक मिळवला आहे. तिच्या या यशामुळे सध्या गावासह जिल्हाभरात तिचे कौतुक होत आहे.कोल्हापूरच्या राधानगरी तालुक्यात पुरेशा सोयीसुविधा नसलेलं जोगेवाडी हे गाव डोंगराळ भागात वसले आहे. या गावातील रेश्मा बाजीराव ऱ्हाटोळ या मुलीने आपल्या नावाचा ठसा एमपीएससी परीक्षेतून उमटवला आहे.
रेश्माने जोगेवाडी गावातच तिचे १ ली ते ४ थी पर्यंतचे प्राथमिक शिक्षण घेतले. तर ५ वी ते १० वी पर्यंतचे माध्यमिक शिक्षण तळाशी येथील शाळेत तिने पूर्ण केले. त्यानंतर बिद्री येथे १२वी पर्यंत शिक्षण घेऊन तिने मॅकॅनिकल या ब्रांचमधील डिप्लोमाची पदवी पॉलिटेक्निक कॉलेज, कोल्हापूर येथे प्राप्त केली. तर डी. वाय. पाटील अभियांत्रिकी महाविद्यालयात तिने बी.ई. मेकॅनिकल ही इंजिनिअरिंगची पदवी घेतली. कॉलेजमध्ये शिक्षण घेत असतानाच रेश्माने एमपीएससी परीक्षेत आपलं नाव कमविण्याची जिद्द धरली होती.बी.ई. नंतर तिने एमपीएससी परीक्षेसाठी पूर्ण वेळ दिला होता. पण काही परीक्षांमध्ये अगदी थोड्या गुणांनी अपयश आले होते. तरी देखील खचून न जाता अभ्यास सुरू ठेवला. आणि त्यातूनच आता राज्य उत्पादन शुल्क दुय्यम निरीक्षक परीक्षेत यश प्राप्त झाले आहे, असं मत रेश्माने सांगितलं.
रेश्माचे वडील बाजीराव ऱ्हाटोळ हे भोगावती साखर कारखान्यात हमालीचे काम करतात. रेश्माला आणि तिच्या भावांना संपूर्ण शिक्षण पूर्ण करू देताना वडिलांनी खूप कष्ट घेतले आहेत. पैशाची कोणतीही कमतरता न जाणवू देता त्यांनी रेश्माला सर्व बाजूंनी पाठिंबा दिला होता. त्यामुळे आता तिच्या यशाने त्यांची छाती अभिमानाने फुलून गेली आहे. हमाली करत असून देखील बाजीराव ऱ्हाटोळ यांनी एका मुलाला आयटीआय, तर दुसऱ्या मुलाला बीएस्सी पर्यंत शिकवले आहे. तर आता रेश्माने राज्य उत्पादन शुल्क दुय्यम निरीक्षक परीक्षेत ओबीसी महिलांमधून राज्यात प्रथम क्रमांक पटकावून बाजी मारली आहे. यामुळे तिचे घरातील सर्व सदस्यांकडून देखील विशेष कौतुक होत आहे.