भाविकांच्या भक्ती व निष्ठेमुळे श्रीगुरु स्वामींची महती वाढत चालली आहे – पराग सोमण
श्री वटवृक्ष स्वामी महाराज देवस्थान कार्यालयात पराग सोमण यांचा सत्कार करताना महेश इंगळे व अन्य दिसत आहेत.
भाविकांच्या भक्ती व निष्ठेमुळे श्रीगुरु स्वामींची महती वाढत चालली आहे – पराग सोमण
(प्रतिनिधी अक्कलकोट, दि.२/७/२३) – श्री वटवृक्ष स्वामी महाराज देवस्थान हे श्री स्वामी समर्थांचे मूळस्थान आहे. श्री स्वामी समर्थ महाराज हे ब्रम्हांडनायक आहेत. गुरूंचे गुरु आहेत. आज गुरुपौर्णिमेच्या पूर्व प्रभाती येथील श्री वटवृक्ष स्वामी महाराज मंदिरात स्वामी समर्थांचे दर्शन घेण्याचा योग आल्यानंतर भाविकांची प्रचंड गर्दी पाहून भारावलो. स्वामी समर्थांवर भाविकांची प्रचंड श्रद्धा आहे, कारण स्वामी समर्थांनाच गुरु मानणारे अनेक स्वामी भक्त आहेत. निस्सीम भाविकांच्या भक्ती व निष्ठेमुळे श्री स्वामी समर्थांची माहिती अलीकडील काळात खूपच वाढत चालली असल्याचे प्रतिपादन भारतीय प्रशासन सेवेचे अधिकारी पराग सोमण यांनी केले. ते नुकतेच येथील श्री वटवृक्ष स्वामी महाराज मंदिरास भेट देऊन श्री स्वामी समर्थांचे दर्शन घेतले. याप्रसंगी मंदिर समितीच्या वतीने समितीचे चेअरमन व नगरसेवक महेश इंगळे यांनी पराग सोमण व सहकाऱ्यांचा श्री स्वामी समर्थांचे कृपावस्त्र, प्रसाद, प्रतिमा देऊन यथोचित सन्मान केला. यावेळी सोमण बोलत होते. पुढे बोलताना सोमण यांनी गुरु पौर्णिमेनिमित्त श्री वटवृक्ष स्वामी महाराज देवस्थानच्या वतीने मंदिर समितीचे अध्यक्ष महेश इंगळे यांनी सर्व स्वामी भक्तांचे दर्शन सुलभतेने होण्याकरिता सर्वतोपरी जय्यत तयारी केलेली आहे. भाविकांना मंदिर परिसरात आल्यानंतर कोणत्याही प्रकारचे त्रास होऊ नये याकरिता विशेष दर्शन रांगेचे नियोजन करण्यात आले आहे. त्यामुळे सर्व स्वामी भक्तांना सुलभतेने स्वामींचे दर्शन होणार हे पाहून खूपच समाधान झाले असल्याचे मनोगत व्यक्त केले. याप्रसंगी मंदिर समितीचे सचिव आत्माराम घाटगे, विश्वस्त महेश गोगी, प्रसाद सोनार, गिरीश पवार, संजय पवार, श्रीकांत मलवे, ऋषिकेश लोणारी, सर्कल माने व सर्कल कुरनूरकर इत्यादी उपस्थित होते.
फोटो ओळ – श्री वटवृक्ष स्वामी महाराज देवस्थान कार्यालयात पराग सोमण यांचा सत्कार करताना महेश इंगळे व अन्य दिसत आहेत.
