Kalyani Nagar : ”हिट अँड रन” प्रकरणी सहजासहजी कोणालाही सोडणार नाही – गृहमंत्री देवेंद्र फडणवीस
पुणे (प्रतिनिधी) : गेल्या दोन दिवसांपासून राज्यात सर्वाधिक चर्चेत असलेल्या पुण्यातील ‘हिट अँड रन’ प्रकरणी वेगवान घडामोडी घडत आहेत. आता हे प्रकरण पुणे पोलीस आयुक्तांनी अतिशय गंभीरतेने घेतल्याचे सांगत याप्रकरणी पबचालक व अल्पवयीन आरोपी वेंदात अग्रवालचे वडील विशाल अग्रवाल यांना अटक केली असून राज्याचे गृहमंत्री देवेंद्र फडणवीस यांनी आज दि.(21 मे) रोजी पुणे पोलीस आयुक्तालयाची भेट घेतली.
यावेळी, पोलीस आयुक्तांसह वरिष्ठ पोलीस अधिकाऱ्यांची बैठक घेऊन संबंधित प्रकरणाची सखोल माहिती घेतली. याप्रकरणी कोणत्याही प्रकारचा निष्काळजीपणा खपवून घेतला जाणार नाही, असे गृहमंत्र्यांनी स्पष्ट केले आहे. त्यानंतर, स्वत: गृहमंत्र्यांनी पत्रकार परिषद घेऊन घटनेची माहिती देत, याप्रकरणी कोणालाही सोडलं जाणार नाही, पोलीस पुन्हा वरच्या न्यायालयात जातील, असे राज्याच्या गृहमंत्र्यांनी म्हटले.
पुण्यातील कल्याणीनगरमधील पोर्शे कार अपघातप्रकरणी गृहविभाग युद्धपातळीवर काम करत आहे. आता तर थेट गृहमंत्र्यांनीच याप्रकरणाची गंभीर दखल घेत आज पुणे येथील पोलीस आयुक्तालयाला भेट दिली . त्यानंतर, पोलीस आयुक्तांशी संबंधित घटनेची व तपासाची सखोल चौकशी करुन पत्रकार परिषद घेत माहिती दिली. ”राज्यातील जनतेमध्ये प्रचंड प्रमाणात रोष आणि नाराजी आहे. मी संबंधित पोलिसांसोबत याविषयी बैठक घेऊन सर्वच बाबतीत विस्तृतपणे चर्चा केली. मुळातच ही घटना घडल्यानंतर पोलिसांनी कारवाई करत जो काही अहवाल बाल न्यायमंडळाकडे दिला आहे त्यात 304 कलमान्वये गुन्हा दाखल केला आहे. 17 वर्षे 8 महिन्यांचा हा मुलगा असल्याने बाल न्यायमंडळाने आरोपीला जामीन मंजूर केला.
मात्र, निर्भया हत्याकांडनंतर बाल हक्क मंडळामध्ये जे बदल करण्यात आले आहेत, त्यानुसार 16 वर्षांपेक्षा अधिक वयाचा मुलगा असल्यास त्यास प्रौढ म्हणून संबोधिले पाहिजे. त्यानुसार, पोलिसांनी बाल हक्क मंडळापुढे तसा अहवालही दिला होता. मात्र, बाल न्यायमंडळाने तो आदेश सीन अँड साईटप्रमाणे बाजूला ठेवल्याने आरोपीस जामीन मिळाल्याचे फडणवीसांनी सांगितले. तसेच, दिल्लीतील निर्भया हत्याकांडाचा संदर्भ फडणवीसांनी पत्रकार परिषदेत दिला.
देवेंद्र फडणवीस पुढे बोलताना म्हणाले की, बाल न्याय मंडळाने दिलेला निकाल हा पोलिसांसाठी देखील धक्कादायक होता.कारण, पोलिसांनी याप्रकरणात सगळे पुरावे दिले आहेत, त्तात्काळ वरच्या कोर्टात अर्ज देखील दाखल करण्यात आला आहे. मात्र, वरच्या कोर्टाने आधी बाल न्यायमंडळाकडे जाण्याचे पोलिसांना सांगितले. त्यामुळे, आम्ही बाल हक्क मंडळाकडे पुन्हा अर्ज दाखल करत आहोत, जर बाल हक्क मंडळाने गंभीर गुन्हा समजून आदेश दिला नाही, तर पोलीस वरच्या न्यायालयात जातील.
याप्रकरणी अल्पवयीन मुलाला मद्य विकल्याबद्दल पहिल्यांदा संबंधित पबरवर कारवाई केली असून चौघांना अटक करण्यात आली आहे. तर, मुलगा अज्ञात असतानाही मुलाला विना क्रमांकाची गाडी दिल्याने अल्पवयीन आरोपीच्या वडिलांवर कारवाई करण्यात आली आहे. याप्रकरणास पुणे पोलिसांनी गांभीर्याने घेतले आहे, हे सहज सोडून दिले जाणार नाही, अशा शब्दात फडणवीसांनी पुण्यातील अपघात प्रकरणावर गृह विभागाची रोखठोक भूमिका स्पष्ट केली.
तसेच,ज्या पब आणि बारमधे नियमांचे उल्लंघन केलेले आढळेल ते पब आणि बार बंद करण्यात येतील. नवीन पब आणि बारला परवानग्या रहिवासी भागांमधे देण्यात येणार नाहीत.पालकांनी देखील आपल्या मुलांना योग्य दिशा मिळेल, यासाठी काम केले पाहिजे असेही राज्याच्या गृहमंत्र्यांनी पत्रकार परिषदेत नमूद केले.
